Lavice su odigrale sjajno drugo poluvrijeme i pobjedile su u gostima Sloveniju 33:28 u petom kolu EHF Euro kupa.
Izabranice Bojane Popović su nakon loše starta i izjednačenog prvog poluvremena u nastavku dodale gas i stigle do pobjede.
Slovenke su vodile čitavo prvo poluvrijeme. Golovima Gros stvorile su 2:0, imale u nekoliko navrata tri gola prednosti, ali su „lavice“ poravnale na 7:7 i od tada se igralo gol za gol.
Pet golova dala je Gros u prvom dijelu, posljednji za 12:11 koliko je bilo nakon 30 minuta.
Naš nacionalni tim prvi put poveo je u 34. minutu kada je Grbić postigla pogodak za 14:13.
Ekipe su se smjenjivale u vođstvu do 38. minuta. Tada je Slovenija povela 17:16, a onda su naše djevojke odgovorile vezanim golovima Raičević, Malović i Grbić za 17:19 i natjerale Dragana Adžića da zove tajm aut.
Od tog momenta naše cure su odlično čuvale i uvećavače prednost, posljednji priključak domaće rukometašice imale su u 48. minutu na 23:24, ali je ubrzo bilo plus tri, a golom Grbić na četiri minuta prije kraja i plus pet (26:31). U samoj završnici bilo je i maksimalnih šest golova razlike.
Tako su izabranice Bojane Popović napravile lijep revanš Slovenkama za poraz na Svjetskom prvenstvu i stigle do šestog boda u EHF Euro kupu, pa su na drugom mjestu iza Norveške. Slovenija je treća, Sjeverna Makedonija četvrta.
Jovanka Radičević dala je devet golova, Itana Grbić osam, Ema Ramusović i Milena Raičević po četiri, Đurđina Malović se tri puta, a Ivona Pavićević dva puta upisala u strijelce. Jedan gol postigla je Tatjana Brnović.
