Rukometašice Budućnosti Bemax odigrale su dobro prvo poluvrijeme, ali su razočarale izdanjem u drugom dijelu meča protiv Bitighajma.
Odvelo ih je to u ubjedljiv poraz na otvaranju Lige šampiona.
“Ništa nijesmo ispoštovale i nije bilo onako kako smo svi očekivali. Dugo smo analizirali protivnika, znali smo sve što radi i sve to isto je ponovio na utakmici. Ne mogu sebi da objasnim kako me je, na primjer, Kudlač – koja ima ogromno iskustvo, ali je već veteranka, dva puta prošla”, kazala je pivotkinja Ivana Godeč za Pobjedu i dodala:
“Ovako ne možemo da igramo Ligu šampiona – sa puno promašenih zicera, 17 tehničkih grešaka. U prvom poluvremenu, na pozicioni napad smo primile samo tri gola, a ostali su bili iz tranzicije. To, možda, sa strane nije tako izgledalo, ali taj prvi talas nijesmo zaustavile. Bitighajm igra tako, konstantno „vuče“ kontru, posebno sa lijeve strane, ali smo uspjele krilo da im zatvorimo. Sve drugo smo mogle mnogo bolje.”
