Ko je „žena iz sjenke“ koja će nositi olimpijsku baklju na putu ka Parizu: Ima 102 godine i simbol je ženske borbe protiv nacizma

Melani Berger-Vol, 102-godišnjakinja koja je bila članica francuskog pokreta otpora tokom užasne nacističke okupacije u Drugom svjetskom ratu, nosiće olimpijski plamen na putu za Pariz, objavila je novinska agencija Frans 24.

„Žena iz sjenke“, kako je Melani Berger-Vol bila poznata tokom okupacije 1940-1944, određena je, uprkos poznim godinama, da nosi olimpijski plamen 22. juna, kada baklja bude prolazila kroz Sent Etjen.

To se tumači kao važan potez francuskih vlasti, uzimajući u obzir vrijednosti koje je Melani Berger-Vol promovisala tokom godina stradanja i mučeništva francuskog naroda.

Iako je bila zabrinuta zbog težine baklje, baka Melani, zaštitnica ženskih prava, odmah je prihvatila predlog zvaničnika i gradske skupštine Sent Etjena.

„Oduvijek sam voljela sport. Moj ideal je oduvijek bio da ujedinim svijet, a Olimpijske igre su odlično vrijeme za upoznavanje drugih ljudi“, rekla je Melani, baka bivše gimnastičarke Emili Vol, koja je nastupila na Olimpijskim igrama u Atlanti 1996 .

Rođena u Austriji, 1921. godine, u radničkoj jevrejskoj porodici, Melani Berger-Vol je započela svoj aktivizam kao tinejdžerka, kada je bila dio grupe krajnje ljevice.

Nakon aneksije Austrije od strane nacističke Njemačke, napustila je rodnu zemlju i stigla u Pariz 1939. godine, prerušena u muškarca.

Ubrzo je i Francuska postala meta Hitlerovih zločinačkih snaga, tako da su izbjeglice poput Melani smatrane pravim neprijateljima Rajha.

Shodno tome, okupacione vlasti donijele su odluku da ih iz glavnog grada pošalju u izbjeglički kamp u Pou, komuni na jugozapadu Francuske.

Melani Berger-Vol nikada nije stigla tamo, skočivši iz voza na željezničkoj stanici Klermon Feran. Priključila se francuskom pokretu otpora, da bi je u januaru 1942. uhapsili nacisti, brutalno pretukli i podvrgnuli paklenom ispitivanju.

Melani je izbjegla smrtnu kaznu, ali je morala da služi 13 mjeseci teške robije. U ljeto 1944. je pobjegla iz zatvora, do kraja rata bila u borbenim redovima…